​ന്യൂഡൽഹി : രാജ്യത്തുടനീളമുള്ള കോടതികളിൽ അനാവശ്യമായി അവധികൾ (Adjournments) നൽകുന്നത് നിയന്ത്രിക്കാനും, കേസുകൾ വേഗത്തിൽ തീർപ്പാക്കുന്നതിന് കൃത്യമായ സമയപരിധി നിശ്ചയിക്കാനും ആവശ്യപ്പെട്ട് സമർപ്പിച്ച റിട്ട് ഹർജി സുപ്രീം കോടതി തള്ളി. ജസ്റ്റിസ് വിക്രം നാഥ്, ജസ്റ്റിസ് വി. മോഹന എന്നിവരടങ്ങിയ ബെഞ്ചാണ് ഹർജി നിരസിച്ചത്.
​'രജത് v. യൂണിയൻ ഓഫ് ഇന്ത്യ' (Rajat v. Union of India and Others) എന്ന് പേരിട്ടിരുന്ന ഹർജിയിൽ, അസാധാരണവും ബോധ്യപ്പടുത്താൻ കഴിയുന്നതുമായ സാഹചര്യങ്ങളിൽ മാത്രമേ കോടതികൾ അവധി അനുവദിക്കാവൂ എന്ന് നിർദ്ദേശിക്കണമെന്ന് ആവശ്യപ്പെട്ടിരുന്നു. കൂടാതെ ഓരോ അവധിക്കും വ്യക്തമായ കാരണങ്ങൾ രേഖപ്പെടുത്തുക, അനാവശ്യമായി അവധി ചോദിക്കുന്നവർക്ക് കനത്ത പിഴ ചുമത്തുക, കേസുകൾ മുൻഗണനാക്രമത്തിൽ തീർപ്പാക്കാൻ 'യൂണിഫോം നാഷണൽ കേസ് ഫ്ലോ മാനേജ്‌മെന്റ് പോളിസി' നടപ്പിലാക്കുക തുടങ്ങിയ ആവശ്യങ്ങളും ഹർജിയിൽ ഉണ്ടായിരുന്നു.
​എന്നാൽ, കോടതികളുടെ പ്രവർത്തനങ്ങളെയും അവധികളെയും സംബന്ധിച്ച ഇത്തരം വിഷയങ്ങൾ ബാർ കൗൺസിൽ ഓഫ് ഇന്ത്യ, സ്റ്റേറ്റ് ബാർ കൗൺസിലുകൾ, അല്ലെങ്കിൽ ഹൈക്കോടതി/ഡിസ്ട്രിക്റ്റ് കോർട്ട് ബാർ അസോസിയേഷനുകൾ തുടങ്ങിയ പ്രൊഫഷണൽ സംഘടനകളുടെ മുൻപാകെയാണ് ഉന്നയിക്കേണ്ടതെന്ന് വ്യക്തമാക്കിയ സുപ്രീം കോടതി ഹർജി സ്വീകരിക്കാൻ വിസമ്മതിക്കുകയായിരുന്നു.
​വാദം കേൾക്കുന്നതിനിടെ, ഹർജിക്കാരൻ നേരിട്ട് ഹാജരായപ്പോൾ (Party in person) അഭിഭാഷകന്റെ ബാൻഡ് ധരിച്ചതിനെ ജസ്റ്റിസ് വിക്രം നാഥ് ചോദ്യം ചെയ്തു. താൻ ഒരു അഭിഭാഷകനാണെന്നും എന്നാൽ ഈ ചട്ടം അറിയില്ലായിരുന്നുവെന്നും ഹർജിക്കാരൻ പറഞ്ഞപ്പോൾ, സ്വന്തം കേസിൽ ഹർജിക്കാരനായി വരുമ്പോൾ അഭിഭാഷകന്റെ ബാൻഡ് ധരിക്കരുതെന്നും, മറ്റൊരു കക്ഷിക്കുവേണ്ടി കൗൺസിലായി വാദിക്കുമ്പോൾ മാത്രമേ അത് ധരിക്കാവൂ എന്നും സുപ്രീം കോടതി ബെഞ്ച് ഓർമ്മിപ്പിച്ചു.